ಕಾಂಗ್ರೆಸ್ ನ ಗ್ಯಾರಂಟಿ ಈಡೇರಿಕೆಗೆ SC/ST ಸಮುದಾಯಗಳ ಹಣವೇಕೇ? ಪರಿಶಿಷ್ಟರೆಲ್ಲಾ ಈಗಾಗಲೇ ಉದ್ಧಾರವಾಗಿದ್ದಾರೆಯೇ? ಪರಿಶಿಷ್ಠರ ₹11,000 ಕೋಟಿಯನ್ನು ಗ್ಯಾರಂಟಿ ಯೋಜನೆಗೆ ಬಳಸಿದ ಮೇಲೆ 7D ರದ್ದುಗೊಳಿಸಿದ್ದು ಯಾಕೆ? ಹಾಗದರೆ ಅದು ಮೂಗಿಗೆ ತುಪ್ಪ ಸವರುವ ನಾಟಕವೇ? ಅಂಬೇಡ್ಕರರ ಕಾಲದಿಂದಲೂ ಬಹುಷಃ ದಲಿತರಿಗೆ ಕಾಂಗ್ರೆಸ್ ಅನ್ಯಾಯ ಮಾಡಿದಷ್ಟು ಮತ್ಯಾರು ಮಾಡಿಲ್ಲ ಅನಿಸುತ್ತದೆ. ಏಕೆಂದರೆ ದಲಿತರನ್ನು ಯಾಮಾರಿಸುವ ಕಲೆ ಕಾಂಗ್ರೆಸ್ ಗೆ ಕರಗತವಾಗಿದೆ. ಆದರೆ ದಲಿತರಿಗೆ ಅಥ೯ವಾಗದಿರುವುದು ದುರಂತದ ಸಂಗತಿ.

ಕಳೆದ ಬಾರಿಯ ಸಾವ೯ತ್ರಿಕ ಚುನಾವಣೆಯಲ್ಲಿ ಕಾಂಗ್ರೆಸ್ ದಲಿತರ ಉದ್ಧಾರಕ್ಕೆ ಜನ್ಮವೆತ್ತಿದೆ ಎನ್ನುವ ಹಾಗೇ ಬಹುತೇಕರು ಪ್ರಚಾರ ಮಾಡಿದ ಪರಿಣಾಮ ಪರಿಶಿಷ್ಠ ಸಮುದಾಯಗಳ ಓಟಿನಿಂದಲೇ ಸ್ಪಷ್ಟ ಬಹುಮತ ಪಡೆದು ರಾಜ್ಯದಲ್ಲಿ ಅಧಿಕಾರದ ಚುಕ್ಕಾಣಿ ಹಿಡಿದ ಕಾಂಗ್ರೆಸ್ ಪಕ್ಷ ಅಧಿಕಾರವನ್ನು ಮಾತ್ರ ಪರಿಶಿಷ್ಟರಿಗೆ ನೀಡದೆ ಸಿದ್ದರಾಮಯ್ಯರಿಗೆ ಎರಡನೇ ಬಾರಿಗೆ ಅವಕಾಶ ಮಾಡಿಕೊಟ್ಟಿತು. ಈಗ ದಲಿತರ ದುಡ್ಡು ದುಬ೯ಳಕೆ ಮಾಡಿಕೊಂಡು ಅದರಲ್ಲಿ ಸಿದ್ದರಾಮಯ್ಯರ ಜಾತ್ರೆ ಮಾಡುತ್ತ ದಲಿತ ವಿರೋಧಿ ನಡೆ ಅನುಸರಿಸುತ್ತಿರುವುದು ಎಷ್ಠರ ಮಟ್ಟಿಗೆ ಸರಿ? ಸಮಾಜ ಕಲ್ಯಾಣ ಇಲಾಖೆ ಸಚಿವರಾದ ಡಾ.ಹೆಚ್.ಸಿ. ಮಹದೇವಪ್ಪನವರೇ ಪರಿಶಿಷ್ಟರ ಹಣವನ್ನು ಇತರೆ ಕಾರ್ಯಗಳಿಗೆ ನೀಡಿ ಪರಿಶಿಷ್ಟರನ್ನು ಬರಿಗೈಲಿ‌ ನಿಲ್ಲಿಸಿ ಬರಿ ಸಂವಿಧಾನ ಪೀಠಿಕೆ ಓದಿದರೆ /ಓದಿಸಿದರೆ ಆಗುವ ಪ್ರಯೋಜನವೇನು? ಇದು ಬಾಬಾಸಾಹೇಬರ ಆಶಯಕ್ಕೆ ಅವಮಾನ ಮಾಡಿದಂತಾಗುವುದಿಲ್ಲವೇ? ಇದೇನಾ ಸಂವಿಧಾನದ ನೆರಳು…??